"Móšeń w zapadźe - korjeń pak we Łužicy!", tak rěka projekt stawizniskeho kursa 10. lětnika. Rozestajichmy so ze časom po přewróće: wšitko bě nowe, wšitko bě njeznate, wšitko bě hinak. Zhonichmy wo času wulkeje swobody, ale tež wo ćežach a wulkich wužadanjach dźěła abo swójskich sonow dla. Rěčachmy z ludźimi, kiž su do zapada šli, zo bychu dźěło wukonjeć móhli, kiž su towaršnostne procesy w spěwje a kabaretnych programach předźěłali abo serbske žiwjenje a institucije znowa rjadowali. Zanurichmy so do časa, kiž je za nas daloko prječ, kiž pak nam wuwědomi, zo je wosebitosć serbskeje towaršnosće stajnje tež wosebite wužadanje w času přewrótow. Smy spóznali, zo je derje za wěsty čas do cuzby hić, ale nawrót zaruči, zo dale našu rěč a kulturu zdźeržimy.
Dnja 10. junija 2024 bě skónčnje tak daloko: Po měsacy trajacym přihoće a ćežkim dźěle běchmy, skupina šulerjow 10. lětnika, do Berlina přeprošeni, zo bychmy so na přepodaću myta cyłozwjazkoweho wubědźowanja wobdźělili. Cyłkownje 33 lawreatow, wobstejacych z 200 młodostnych a jich projektowych přewodow, přijědźe z cyłeje Němskeje.
Atmosfera bě wulkotna. Spožčenje wotmě so w přitomnosći statneho ministra Carstena Schneidera, społnomócnjeneho zwjazkoweho knježerstwa za wuchodnu Němsku, a dalšich čłonow jury. Bě hižo jimace, telko wažnych wosobinow naraz widźeć. Zarjadowanje bu wot Měrka Drotschmanna, kotrehož mnozy z nas jako MrWissen2go z YouTube znaja, moderěrowane.
Naša wutroba wótře pukotaše, hdyž bě naš projekt "Móšeń we zapadźe – korjenje pak we Łužicy" namołwjeny. Móžachmy to lědma wěrić, ale běchmy woprawdźe 1. městno dobyli! Wulki přiklesk, wjesołe mjezwoča našich sobuwojowarjow a hordozne wobliča našich wučerjow – wšo to ženje njezabudźemy.
Jeli chceće wokomik hišće raz sobu dožiwić, móžeće sej stream spožčenja myta tež po nim hišće wobhladać. Wot mjeńšiny 58:50 smy potom widźeć:
https://www.youtube.com/watch?v=s5uUjVt7VnY&t=1s
A tu je naše mytowane widejo:
