Srjedu wotmě so na Serbskej wyšej šuli pućowanski dźeń. 6. lětnik wuži šansu a dojědźe sej do Budyšina. Tu wopytachu jako prěnje Ludowe nakładnistwo Domowiny. Tam wjedźeštaj sobudźěłaćerjej knjeni Mikławškowa a knjez Nuk  dohromady 26 šulerjow w dweju skupinomaj přez jednotliwe wotdźěle domu, kaž lektorat, redakciju Serbskich Nowin, rozšěrjenje, zhotowjenje a naposledk Smolerjec kniharnje. Mnoho prašenjow šulerjow sudopokaz zajima, tak wobwonjachu so, kelko knihow so wob lěto wudawa a kelko stronow móže kniha maksimalnje měć. Wosebje produkcija knihowwobdźělnikow jimaše. Zo móže so to tež přez wjele lět ćahnyć, jich jara přkwapi. 

Dale wjedźeše puć na Róžowu do kolesowarskeho wobchoda Räderei. Kak reparuju skóncowane koleso? Kelko płaći poprawom dobre koleso? Kotre koleso trjebaš za kotru přiležnosć? Na wšitke tute prašenja a wjele dalšich dóstachu šulerjo wotmołwu. Nimo toho mějachu tež hnydom składnosć so praktisce wuspytać a hadźicu skóncowaneho kolesa měnjeć. 

Naposledk njesmědźeše wězo tež swobodny čas na hodownych wikach a w měsće pobrachować. W Serbskej kulturnej informaciji SKI so hižo prěnje hodowne dary kupjachu. Wuspěšny pućowanski dźeń za wšitkich šulerjow. Zapłać Bóh nakładnistwu a sobudźěłaćerjam wobchoda Räderei.

Waš 6.lětnik

Zakónčaca jězba 10. lětnika do Prahi bě njezapomnite dožiwjenje, kotrež wotmě so wot 11. hač do 15. septembra 2023. Naša jězba do złoteho města bě połna rozbudźacych dyrdomdejow a napjatych wotkryćow.

Za čas našeho přebywanja w Praze mějachmy składnosć, sej jimacy Praski hród, wobhladać a po Karlowym mosće dundać. Architektura a stawizny tutoho města nas hłuboko fascinowachu.

Nimo kulturnych highlightow dachmy sej tež čěsku kuchnju zesłodźeć, kotraž nas z chłóšćenkami kaž smažený sýr a deftnym gulašom zapleńči. Wječor wotkrychmy sej rozbudźace nócne žiwjenje Prahi.

Dopomnjenki na naš krasny čas w Praze budu nas na přeco přewodźeć.

Waša rjadownja 10/2

Tež lětsa wotměwa so w Budyskim wokrjesu zaso 48h-akcija. Při tym steji čestnohamtski angažement młodostnych w srjedźišću zjawnosće. Tak přesadźa skupiny młodostnych po cyłym wokrjesu samo wuzwolene projekty ze zaměrom, něšto wobstajneho za towaršnosć stworić.

Tež 9. lětnik Serbskeje wyšeje šule “Michał Hórnik” Worklecy je so angažował a so při akciji wobdźělił. Dokelž so jim lětuši poprawny termin njehodźeše, akciju tydźeń zašo přewjedźechu. Tak porjeńšichu z pomocu ilustratora a grafikarja Štefana Hanuša busowe zastanišćo srjedź wsy ze serbskimi bajowymi motiwami.

Tež w šuli so dźěłaše. Młodostni běchu jara pilni a nimo łubje tež pincu šule do porjadka stajichu, kaž tež dalše dźěła wokoło šule wukonjachu.

Zo by so akcija radźiła, su młodostni zdobom na podpěru pokazani. Tu maja ze stron Worklečanskeje gmejny z wjesnjanostu Clemensom Poldrackom spušćomneho partnera po boku. Tež Spěchowanske towarstwo wyšeje šule je akciju podpěrało. Wutrobny dźak wšitkim wobdźělenym!

Přećopłeho wjedra dla dyrbješe so sněhakowarske lěhwo lětsa dwójce přesunyć. Ale 06.03.23 běše skónčnje tak daloko. 32 šulerkow a šulerjow sydmeho lětnika a štyri přewodniki podachu so z busom do čěskeho Bedřichova. Cyły tydźeń so sněhowaše, sněha bě tuž skónčnje dosć. W třóch skupinach a w běhu štyrjoch dnjow nawuknychu šulerjo alpinske sněhakowanje z hory dele. Ale tež z liftom na horu dyrbjachu šulerjo najprjedy raz nawuknyć. Na poslednim dnju znamkowaše so technika alpinskeho sněhakowanja a jězdźenje w formaciji. Zakónčace wubědźowanje w Super G dobychu pola holcow Antonia Matkec a Miriam Brücknerec a pola hólcow Jeffry Raab a Markus Ričl.

Šulerjo a šulerki móžachu so přez rjane dožiwjenja kaž bowling, kino wječor, kupanje w kupjeli w Jablonecu wjeselić.

Bjez zranjenjow ale z ćežkimi nohami móžachu maćerki a nanojo swoje dźěći po štyrjoch nocach w čěskim hotelu zaso přijimać.

Wšěm pomocnikam wutrobny Zapłać Bóh a nadźijomnje na přichodnu sněhapołnu zymu 2024.