Šulerjo dźesateho lětnika Serbskeje wyšeje šule Worklecy wobdźělichu so zašły tydźeń na zwjazkowym finalu Młodźina trenuje za Olympiju w Berlinje. Za to kwalifikowachu so w januaru z bjezporočnym dobyćom sakskich mišterstwow. Wutoru rano podachu so šulerjo z ćahom do němskej stolicy a zaćahnychu do hotela. Srjedu dyrbjachu hižo zahe z łoža, wšako běchu w skupinje, kotraž dopołdnja swoje hry hraješe. Wolejbulisća so tak prawje do prěnjej hry bohužel njenamakachu a prěnju sadźbu wotedachu. Druhu sadźbu za to sebjewědomići wustupowachu a jasnje za sebje rozsudźichu. Startowachu potajkim hnydom z Tie-Breakom do wubědźowanja. Tutón tež jara sylnje započinachu, naposledk pak njetrjebawši wotedachu. Tuta poražka sedźeše hólcam hłuboko we hłowach, dla čehož tež slědowacu druhu hru wotedachu. W třećej hrě dnja mějachu so ze sylnym mustwom z Mnichowa měrić. Poprawom sej tu žane šansy njewulićichu, po přěhratej prěnjej sadźje pak w druhej pokazachu, što w nimi tći. Nawjedowachu z 21:17 dypkami, doniž sudnik wopačny rozsud twori. Štož je poprawom jenož jedyn dypk hódne, zaběraše šulerjow tak jara, zo sadźbu naposledk z 22:25 wotedachu. Mnichowčenjo běchu pjatk w finalu zastupjeni, tam pak na mustwo z Berlina podležachu.
Z tym hrajachu štwórtk wo městna 13-16. Hnydom wjacori hosćo z Łužicy běchu sej do Berlina dojěli, zo bychu mustwo podpěrali. Starši a přećeljo mócnje sobu wyskachu, tak zo běchu tež přez zjawny stream słyšeć. Tež zranjeny kapitan mustwa Jurij Bobka do stolicy přijědźe a mustwo z ławki sem podpěra. Dobra nalada w hali motiwowaše šulerjow a tuž tući na polu swoju klasu prawje wuhrachu. Přečwiniki sej w prěnjej sadźbje žanu radu njewědźachu. W druhej sadźbje běchu přečiwiki sylniše a wosebje z preciznymi bulemi krótko za blokom přeco zaso dypkowachu. Wuwi so napjata hra, kotruž Worklečenjo za sebje rozsudźichu a móžachu so skónčnje tež nad dobyćom wjeselić. Jara napjata hra wo 13. městno wotměješe so na samsnym niwowje. Prěnju sadźbu šulerjo ze Sakskeje za sebje rozsudźichu, druhu šulerjo ze Saksko-Anhaltskeje. W Tie-breaku běše bohužel napinanje pytnyć a hra so woteda. Najprjedy trochu přesłapjeni šulerjo pak so w běhu tydźenja hišće přez kwalbuhódne 14. městno wjeselichu.
Nimo wolejbula wopytachu šulerjo tež mjetańcu sjredu wječor we wupředatej Max-Schmelingowej-hali, hdźež dožiwichu přewšo dobru naladu nad jara snadnym dobyćom Berlinskich Liškow. Tež město sej wobhladachu a Elaine Jensch organizowa za skupinu zetkanje ze zwjazkowej ministerku za sport a ćestnohamt knjeni dr. Christianu Schenderleinowu. Tu mějachu zajimawu rozmołwu wo jeje dźěło a naslědnje jara zajimawe wjedźenje přez twarjenja zwjazkoweho sejma. Tež Braniborske wrota, Alexandrowe naměsto abo telewizijnu wěžu sej wobhladachu.Z kopicu nowych nazhonjenjow, impresiow a zaćućow podachu so sobotu zaso do Łužicy, hdźež šulerjow nětko zaso zakónčace pruwowanja wočakuja.
Worklečan šulerske mustwo: Gabriel Šiman, Markus Ričl, Tiberius Statnik, Syman Wowčer, Kilian Cyž, Tadej Krječmer, Jakub Zimmermann a Jurij Bobka.
Šulerjow přewodźeštaj Křesćan Bejmak a Šćěpan Wjeńka
Schüler der 10. Klasse der Sorbischen Oberschule Räckelwitz nahmen vergangene Woche am Bundesfinale „Jugend trainiert für Olympia“ in Berlin teil. Nach dem Gewinn der sächsischen Meisterschaft im Januar vertraten sie Sachsen im Volleyballwettbewerb. Trotz starker Konkurrenz und knapper Niederlagen erreichte die Mannschaft am Ende einen beachtlichen 14. Platz in Deutschland. Neben den Spielen erlebten die Schüler auch ein abwechslungsreiches Programm in Berlin mit Stadtbesichtigungen, einem Handballspiel sowie einem Besuch im Bundestag und einem Treffen mit Bundesministerin Dr. Christiane Schenderlein. Begleitet wurde die Mannschaft von Christian Böhmak und Stephan Wenke.