Wutoru, dnja 17.3.26 nawječor poda so bus Schmidt-Schwarzec předewzaćela z Budyskimi šulerjemi na puć do Worklec. Po tym, zo běchmy tež my Worklečan šulerjo do busa zalězli, wotjědźe bus wokoło 19:00 hodź. we Worklecach a poda so na dołhi puć do Francoskeje. Běchmy hižo wšitcy cyle napjeći a wjeselachmy so na našu wuměnu z bretonskimi šulerjemi.
Na přichodnym dnju dojědźechmy sej dopołdnja do Parisa. Běchmy wšitcy hišće jara mučni, dokelž njeběchmy w busu tak derje spali. Ale to běše nam w tutym wokomiku wšojedne, wšako mějachmy hižo prěni krasny wid na Paris. Na horiconće wuhladachmy samo hižo Eiffelowu wěžu.
Wotstajichmy naše kófry w hotelu a podachmy so z Metro do města. Jako prěnje běchmy při Louvre, najwjetšim wuměłstwowym muzeju swěta, kiž je za swoju škleńčanu pyramidu znaty a kiž wobsahuje swětoznate wuměłske twórby. Loni bě so tam něchtó zadobył a krónowe juwele pokradnył. Zdaloka widźachmy Triumfowy wobłuk. Dale dźěše ke katedrali Notre Dame. Tuta bě so 2019 wotpaliła, restawrowała a 2024 znowa wotewrěła. A zo njebychmy sej tute a dalše zajimawostki jenož nimo běhajo wobhladali, dóstachmy nadawk, so wo zajimawostkach Parisa informować a sej tute mjez sobu předstajić.
Štwórtk, 19.3.26 podachmy so z busom do Versailles. Wobhladachmy sej tam swětoznaty hród krala Ludwiga XIV. wot nutřka a běhachmy po wulkim krasnym parku, kiž so při hrodźe přizamknje. Popołdnju wróćichmy so do Parisa. Nětko bě skónčnje tak daloko: jědźechmy z Metro hač k Eiffelowej wěži. Podachmy so wězo tež z liftom na wěžu horje. Při najrjeńšim słónčnym wjedrje mějachmy wulkotny wuhlad přez Paris! Wječor wopytachmy kapałku Sacre-Coeur na hórce Montmartre. Wot tam horjeka skićeše so nam krasny napohlad na nócny Paris.
Pjatk, 20.3.26 wopušćichmy Paris a jědźechmy z busom dale do Bretoniskeje. Kónc tydźenja přebywachmy w našich hóstnych swójbach.
Póndźelu, 23.3.26 wopytachmy bretonsku šulu. Nimo toho, zo wopytachmy bretonsku wučbu, běchu za nas tež wšelake stacije wo žiwjenju w Bretonskej přihotowane. Tak pječechmy Crepes a nawuknychmy bretonski spěw. Popołdnju jědźechmy z busom k Atlantikej a wobhladachmy sej swětłownju.
Wutoru, 24.3.26 zhonichmy wjele wo bretonskich płachtakach w płachtakowym muzeju. Po tym wobhladachmy sej twjerdźiznu w Concarneau při brjohu Atlantika.
Srjedu je w bretonskich šulach swobodnje, tohodla běchmy zaso cyły dźeń w našich hóstnych swójbach.
Štwórtk, 26.3.26 běchmy w měsće Quimper a wopytachmy Muśee départmental, bretonski muzej, w kotrymž wjele wo kulturje a drastach Bretonow zhonichmy. Popołdnju jědźechmy hišće raz z busom k Atlantikej a wobhladachmy sej nahły brjóh pola Pointe du Raz.
Pjatk dopołdnja, 27.3.26 dóstachmy wjedźenje přez katedralu w Quimper. Po tym přebywachmy hišće chwilku w měsće, zo bychmy my sej souveniry a chłóšćenki nakupowali. W 13:30 hodź. bě potom zaso tak daloko: połnje spakowani podachmy so k busej a wotjědźechmy hižo zaso domoj do Łužicy.
Za wšitkich běše to njezapomnite dožiwjenje a wjeselimy so hižo na dalši wopyt bretonskich šulerjow klětu we Łužicy!
Henrik Birkhofen
foto: T. Bulank