My šulerjo a šulerki rjadownje 5 z Serbskeje wyšeje šule Worklecy podachmy so 25.11.2024 do Budyšina. Mějachmy wosebitu česć spěw serbskeje skupiny “Astronawt” nahrawać. Tutón Rap napisaše Matej Dźisławk. W teksće jedna so wo šulskim žiwjenju na našej šuli. Naš wučer knjez Hojer přewodźeše nas do Serbskeho ludoweho ansamla, hdźež hižo Syman Hejduška, kaž tež Matej Dźisławk na nas čakaštaj. Knjez Hejduška posłužowaše techniku nahrawanskich nastrojow. Knjez Dźisławk fotografowaše a piskaše na klawěrje. Napjeći stejachmy za mikrofonami. Za mnohich z nas bě to prěni raz. Spěwachmy a rapowachmy cyły dopołdnjo. Při tym mějachmy wulke wjeselo. Cyła rjadownja je napjata, kak budźe spěw doskónčnje w radiju klinčeć. Na kóncu dnja pokazaše nam Matej Dźisławk hišće studio Serbskeho rozhłosa. To mje wosobinsce jara zajimowaše. Po tutym wulkotnym ale tež napinacym dnju podachmy so wšitcy hromadźe z busom na wróćopuć.
Milan Kandt
foto: F. Šnablowa
